![رابطہ عالم اسلامی کا اسرائیلی آبادکاری کی سرگرمیوں پر برطانیہ اور آسٹریلیا کی پابندیوں کے فیصلوں کا خیرمقدم](/sites/default/files/byan-rabttu-al-alm-ala-slamy-trhwb-bqraray-hkwmtay-almmlkt-almthdt-wa-stralya-frd-qwbat-ly-ala-nshtt-alastytanyt-ala-sray-ylyt_a-rd.jpg.jpeg)

رابطہ عالم اسلامی کا اسرائیلی آبادکاری کی سرگرمیوں پر برطانیہ اور آسٹریلیا کی پابندیوں کے فیصلوں کا خیرمقدم
مکہ مکرمہ:
رابطہ عالم اسلامی نے مقبوضہ فلسطینی سرزمین میں اسرائیل کی غیر قانونی آبادکاری کی سرگرمیوں کے ردعمل میں برطانیہ اور آسٹریلیا کی حکومتوں کی جانب سے پابندیاں عائد کرنے کے فیصلوں کا خیرمقدم کیا ہے۔ رابطہ نے غزہ کی پٹی میں انسانی امداد کی ترسیل میں رکاوٹیں ڈالنے پر ایک اسرائیلی گروپ کے خلاف برطانیہ کی جانب سے پابندیاں عائد کرنے کے فیصلے کا بھی خیرمقدم کیا۔

رابطہ کے جنرل سیکرٹریٹ سے جاری بیان میں، سیکرٹری جنرل رابطہ اور چیئرمین مسلم علماء کونسل، عزت مآب شیخ ڈاکٹر محمد بن عبد الکریم العیسی نے اس ذمہ دارانہ اور اخلاقی مؤقف کو سراہتے ہوئے دنیا کے تمام ممالک اور عالمی برادری پر زور دیا کہ وہ اپنی اخلاقی اور قانونی ذمہ داریاں پوری کریں، انفرادی اور اجتماعی اقدامات اختیار کریں اور مقبوضہ فلسطینی سرزمین میں ہونے والی تمام خلاف ورزیوں کی مذمت اور ان کے خاتمے کے لیے دباؤ میں اضافہ کریں۔ ان خلاف ورزیوں میں غیر قانونی آبادکاری کی سرگرمیاں، فلسطینی سرزمین کی جغرافیائی اور آبادیاتی حیثیت تبدیل کرنے کے اقدامات اور غزہ کی پٹی میں فوجی کارروائیوں میں شدت بھی شامل ہے۔ ڈاکٹر العیسی نے اسرائیلی حکومت کو پابند بنانے کی ضرورت پر بھی زور دیا کہ وہ بین الاقوامی قانونی جواز کی حامل متعلقہ قراردادوں کی فوری تعمیل کرے، جن میں اقوام متحدہ کی سلامتی کونسل کی قرارداد نمبر 2334 (2016ء) اور 19 جولائی 2024ء کو بین الاقوامی عدالتِ انصاف کی جانب سے جاری کردہ مشاورتی رائے بھی شامل ہیں۔ ان میں تمام ممالک کی یہ ذمہ داری بھی شامل ہے کہ وہ غیر قانونی اسرائیلی قبضے کے نتیجے میں پیدا ہونے والی صورتِ حال کو قانونی حیثیت دینے سے گریز کریں، اور اسرائیلی قبضے سے پیدا شدہ صورتِ حال کو برقرار رکھنے کے لیے کسی قسم کی معاونت یا مدد فراہم نہ کریں۔

ڈاکٹر العیسی نے اس سلسلے میں مملکتِ سعودی عرب، مملکتِ اردن، متحدہ عرب امارات، ریاستِ کویت، جمہوریہ انڈونیشیا، اسلامی جمہوریہ پاکستان، جمہوریہ ترکیہ، ریاستِ قطر، عرب جمہوریہ مصر، ریاستِ فلسطین، عوامی جمہوری جمہوریہ الجزائر، جمہوریہ نائجر، جمہوریہ مالدیپ، لیبیا، وفاقی جمہوریہ صومالیہ اور سلطنتِ عمان کے وزرائے خارجہ کی جانب سے جاری مشترکہ بیان کو بھرپور سراہتے ہوئے اس کی مکمل تائید کی۔ انہوں نے فلسطینی عوام کے ساتھ ان ممالک کی غیر متزلزل یکجہتی، ان کے مصائب میں کمی لانے کی کوششوں اور بین الاقوامی قانون اور اقوام متحدہ کی متعلقہ قراردادوں کی بنیاد پر فلسطینی عوام کے جائز حقوق کے لیے ان کی مستقل حمایت کو بھی خراجِ تحسین پیش کیا۔

  **Post date** جمعہ, 20 November 2026

-

 ٹیگز[آفیشل بیانات](/ur/official-press-releases)

<a class="a2a_button_facebook"></a><a class="a2a_button_x"></a><a class="a2a_button_whatsapp"></a><a class="a2a_button_google_gmail"></a><a class="a2a_button_pinterest"></a><a class="a2a_button_copy_link"></a><a class="a2a_button_linkedin"></a>[](https://www.addtoany.com/share#url=https%3A%2F%2Fwww.themwl.org%2Fur%2Frabth-alm-aslamy-ka-asrayyly-abadkary-ky-srgrmywn-pr-brtanyh-awr-asttrylya-ky-pabndywn-ky-fyslwn-ka&title=%D8%B1%D8%A7%D8%A8%D8%B7%DB%81%20%D8%B9%D8%A7%D9%84%D9%85%20%D8%A7%D8%B3%D9%84%D8%A7%D9%85%DB%8C%20%DA%A9%D8%A7%20%D8%A7%D8%B3%D8%B1%D8%A7%D8%A6%DB%8C%D9%84%DB%8C%20%D8%A2%D8%A8%D8%A7%D8%AF%DA%A9%D8%A7%D8%B1%DB%8C%20%DA%A9%DB%8C%20%D8%B3%D8%B1%DA%AF%D8%B1%D9%85%DB%8C%D9%88%DA%BA%20%D9%BE%D8%B1%20%D8%A8%D8%B1%D8%B7%D8%A7%D9%86%DB%8C%DB%81%20%D8%A7%D9%88%D8%B1%20%D8%A2%D8%B3%D9%B9%D8%B1%DB%8C%D9%84%DB%8C%D8%A7%20%DA%A9%DB%8C%20%D9%BE%D8%A7%D8%A8%D9%86%D8%AF%DB%8C%D9%88%DA%BA%20%DA%A9%DB%92%20%D9%81%DB%8C%D8%B5%D9%84%D9%88%DA%BA%20%DA%A9%D8%A7%20%D8%AE%DB%8C%D8%B1%D9%85%D9%82%D8%AF%D9%85)