رابطہ عالم اسلامی کی خیبر پختونخوا میں سکیورٹی چیک پوسٹ پر دہشت گرد حملے کی شدید مذمت
رابطہ عالم اسلامی کی خیبر پختونخوا میں سکیورٹی چیک پوسٹ پر دہشت گرد حملے کی شدید مذمت مکہ مکرمہ: رابطہ عالم اسلامی نے اسلامی جمہوریہ پاکستان کے صوبہ خیبر پختونخوا کے علاقے ڈیرہ اسماعیل خان میں ایک سکیورٹی چیک پوسٹ کو نشانہ بنانے والے دہشت گرد حملے کی شدید الفاظ میں مذمت کی ہے۔ رابطہ کے جنرل سیکرٹریٹ سے جاری بیان میں، سیکرٹری جنرل رابطہ اور چیئرمین مسلم علماء کونسل، عزت مآب شیخ ڈاکٹر محمد بن عبد الکریم العیسی نے اس بزدلانہ دہشت گرد حملے کی سخت مذمت کرتے ہوئے ایک بار پھر اس امر کا اعادہ کیا کہ رابطہ ہر قسم کے تشدد اور دہشت گردی کو، خواہ وہ کسی بھی شکل یا جواز کے تحت ہو، مکمل طور پر مسترد اور اس کی مذمت کرتی ہے۔ ڈاکٹر العیسی نے اسلامی جمہوریہ پاکستان کے ساتھ ہر اس خطرے کے مقابلے میں مکمل یکجہتی کا اظہار کیا جو اس کے امن، استحکام اور عوام کی سلامتی کو نقصان پہنچانے کا باعث بنے۔ انہوں نے اللہ تعالیٰ سے دعا کی کہ وہ جاں بحق افراد کو اپنی وسیع رحمت سے نوازے، انہیں جنت الفردوس میں اعلیٰ مقام عطا فرمائے، اور ان کے اہلِ خانہ کو صبر جمیل عطا کرے۔
