رابطہ عالم اسلامی کی سعودی عرب کے الطوال کمشنری پر حوثی دہشت گرد ملیشیا کے حملوں کی شدید مذمت
مکہ مکرمہ:
رابطہ عالم اسلامی نے مملکتِ سعودی عرب کے خلاف حوثی دہشت گرد ملیشیا کی مسلسل جارحانہ کارروائیوں، اور جازان کے علاقے میں واقع الطوال کمشنری کو نشانہ بنانے کی شدید الفاظ میں مذمت کی ہے، جس کے نتیجے میں متعدد افراد زخمی ہوئے، جبکہ ایک مسجد اور کئی عمارتوں اور گاڑیوں کو نقصان پہنچا۔
رابطہ کے جنرل سیکرٹریٹ سے جاری بیان میں، سیکرٹری جنرل رابطہ اور چیئرمین مسلم علماء کونسل، عزت مآب شیخ ڈاکٹر محمد بن عبد الکریم العیسی نے ایک بار پھر ان بزدلانہ مجرمانہ حملوں کی شدید مذمت کرتے ہوئے کہا کہ یہ کارروائیاں تمام دینی اقدار، بین الاقوامی قوانین اور انسانی روایات کی صریح خلاف ورزی ہیں، اور شہریوں اور شہری تنصیبات کو دانستہ طور پر نشانہ بنانے والی اس دہشت گرد ملیشیا کی مجرمانہ روش کی عکاسی کرتی ہیں۔
ڈاکٹر العیسی نے رابطہ کے تمام عالمی اداروں، اکیڈمیوں اور کونسلوں، نیز اس کے زیرِ سایہ تمام اسلامی اقوام کی جانب سے مملکتِ سعودی عرب کے ساتھ مکمل یکجہتی کا اعادہ کرتے ہوئے اس امر پر زور دیا کہ رابطہ جارحیت کا ارتکاب کرنے والوں کو روکنے، مملکت کی سلامتی، نیز اپنے شہریوں اور اپنی سرزمین پر مقیم افراد کے تحفظ کے لیے کیے جانے والے تمام اقدامات کی بھرپور تائید کرتی ہے۔ انہوں نے اللہ تعالیٰ سے دعا کی کہ وہ مملکت کی سرزمین، قیادت اور عوام کو ہر قسم کے شر اور آفت سے محفوظ رکھے۔
