رابطہ عالم اسلامی نے غزہ کی پٹی میں جاری اسرائیلی خلاف ورزیوں، شہری آبادی، اہم تنصیبات اور شہری بنیادی ڈھانچے کو مسلسل نشانہ بنانے کی شدید الفاظ میں مذمت کی ہے۔
رابطہ کے جنرل سیکرٹریٹ سے جاری بیان میں، سیکرٹری جنرل رابطہ اور چیئرمین مسلم علماء کونسل، عزت مآب شیخ ڈاکٹر محمد بن عبد الکریم العیسی نے غزہ اور پوری مقبوضہ فلسطینی سرزمین میں اسرائیل کی ان قابلِ مذمت کارروائیوں کی شدید مذمت کرتے ہوئے کہا کہ یہ اقدامات دینی اقدار، بین الاقوامی قوانین اور انسانی روایات کی صریح خلاف ورزی ہیں، اور امن کے لیے کی جانے والی تمام کوششوں کو نقصان پہنچا رہے ہیں۔انہوں نے اس ضمن میں مملکتِ سعودی عرب، مملکتِ اردن، متحدہ عرب امارات، ریاستِ قطر، جمہوریہ انڈونیشیا، اسلامی جمہوریہ پاکستان، جمہوریہ مصر اور جمہوریہ ترکیہ کے وزرائے خارجہ کے مشترکہ بیان کے مندرجات کو بھرپور سراہا، جس میں ان اسرائیلی خلاف ورزیوں کا مقابلہ کرنے، فلسطینی عوام کے تحفظ اور ان کے جائز حقوق کی حمایت پر زور دیا گیا ہے۔
ڈاکٹر العیسی نے اس امر پر زور دیا کہ عالمی برادری اپنی اخلاقی اور قانونی ذمہ داریاں ادا کرتے ہوئے مقبوضہ فلسطینی سرزمین میں جاری تمام اسرائیلی خلاف ورزیوں کو فوری طور پر روکنے کے لیے مؤثر اقدامات کرے۔
