رابطہ عالم اسلامی کی جانب سے ریاض میں امریکی سفارت خانے پر ایرانی جارحیت کی شدید مذمت

رابطہ عالم اسلامی کی جانب سے ریاض میں امریکی سفارت خانے پر   ایرانی جارحیت کی شدید مذمت

مکہ مکرمہ:

رابطہ عالم اسلامی نے مملکت سعودی عرب کے شہر ریاض میں ریاستہائے متحدہ امریکہ کے سفارت خانے پر بزدلانہ ایرانی جارحیت کی سخت ترین الفاظ میں مذمت کی ہے، جو خطے کے ممالک کے خلاف اس کی مجرمانہ کارروائیوں کا تسلسل ہے۔

رابطہ کے جنرل سیکرٹریٹ سے جاری بیان میں، سیکرٹری جنرل رابطہ اور چیئرمین مسلم علماء کونسل عزت مآب شیخ ڈاکٹر محمد بن عبد الکریم العیسی نے اس کھلی ایرانی جارحیت کی شدید مذمت کرتے ہوئے کہا کہ یہ کاروائی تمام مذہبی اقدار اور بین الاقوامی وانسانی قوانین اور روایات کی صریح خلاف ورزی ہے۔ ڈاکٹر العیسی نے واضح کیا کہ یہ حملہ ایک ایسے وقت میں کیا گیا ہے جب جنگ کے حوالے سے مملکت سعودی عرب کا موقف بالکل واضح اور دوٹوک رہا ہے، اور اس نے ایرانی عوام اور خطے کے دیگر ممالک کو جنگ کے خطرات سے بچانے کے لیے مخلصانہ اور انتھک کوششیں کی ہیں۔

ڈاکٹر العیسی نے رابطہ کی اکیڈمیز، ادارہ جات اور عالمی کونسلز، اور رابطہ کی چھتری تلے موجود تمام مسلم اقوام کی جانب سے مملکت سعودی عرب کے ساتھ اس سلسلے میں اس کے ہر اقدام پر مکمل یکجہتی کا اعادہ کیا۔  آپ نے باری تعالیٰ سے دعا کی کہ وہ مملکت سعودی عرب کی سرزمین، قیادت اور عوام کو ہر قسم کے شر اور  آفت سے محفوظ رکھے۔