گزشتہ شام، سیکرٹری جنرل رابطہ عالم اسلامی اور چیئرمین مسلم علماء کونسل، عزت مآب شیخ ڈاکٹر محمد العیسی کی موجودگی میں، اور اقوام متحدہ کی جنرل اسمبلی کے اکیاسی ویں اعلیٰ سطحی ہفتے کی سرگرمیوں کے ضمن میں:
اقوام متحدہ کی حمایت، اس کے تہذیبوں کے اتحاد کے اعلیٰ نمائندے میگوئل موراتینوس، اسلامی تعاون تنظیم کے سیکرٹری جنرل جناب اسماعیل ولد شیخ احمد، اقوام متحدہ کی کانفرنس برائے تجارت وترقی کی سیکرٹری جنرل ریبیکا گرینسپین، اور مصنوعی ذہانت کی اخلاقیات سے متعلق تحقیقات میں دلچسپی رکھنے والی مختلف مذہبی قیادتوں کی ایک بڑی تعداد کی شرکت سے؛
اقوام متحدہ کے تعاون سے لڑکیوں کی تعلیم کے مسائل کی عالمی علمبردار اور ’’یومِ ملالہ‘‘ کے ذریعے اس شعبے کے لیے عالمی حمایت حاصل کرنے والی نوبیل امن انعام یافتہ ملالہ یوسف زئی کی شرکت کے ساتھ، جنہوں نے مصنوعی ذہانت کے حوالے سے اپنا منفرد نقطۂ نظر بھی پیش کیا؛
امریکہ کی بڑی مصنوعی ذہانت کمپنیوں، عالمی بینک، ممتاز امریکی جامعات کے نمائندوں اور اقوام متحدہ کے سیکرٹری جنرل کے منصب کے نمایاں امیدواروں کی موجودگی اور شرکت میں:
رابطہ عالم اسلامی نے نیویارک سے ’’سب کے لیے مصنوعی ذہانت... ایمان، انسانی وقار اور مصنوعی ذہانت‘‘ کے عنوان سے ایک خصوصی پروگرام کا آغاز کیا۔
اس پروگرام میں مصنوعی ذہانت کی اخلاقیات سے متعلق امور کے حل کے لیے عالمی سطح پر متنوع شراکت داری کی اہمیت پر توجہ مرکوز کی گئی، جس میں دینی اور تہذیبی پہلو بھی شامل ہیں۔ ان دونوں کے مشترکہ اخلاقی اصول مصنوعی ذہانت کی اخلاقیات سے متعلق تحقیق کے اہم موضوعات میں شامل ہیں، جن کی ذمہ داری بین الاقوامی سطح پر اقوام متحدہ کے تہذیبوں کے اتحاد کو سونپی گئی ہے۔
اس ضمن میں بالخصوص ایسا مواد بھی شامل ہے جو مذہبی، فکری یا دیگر نظریاتی محرکات کے تحت نفرت، تشدد یا تہذیبی تصادم کو ہوا دیتا یا اس کی ترغیب دیتا ہے۔ ٹیکنالوجی کمپنیاں بھی صارفین کی جانب سے مواد میں موجود ایسی خامیوں سے متعلق موصول ہونے والی شکایات کے ذریعے ان مسائل کی نشاندہی کرتی ہیں، جبکہ صارفین کی ایک بڑی تعداد بھی ان خدشات کا اظہار کرتی ہے، اور کمپنیاں اقوام متحدہ کے دائرۂ کار میں متفقہ طور پر تسلیم شدہ ان خامیوں کے تدارک کی خواہاں ہیں۔
چنانچہ بعض افتتاحی خطابات اور ان کے بعد ہونے والے مکالماتی اجلاسوں سے سامنے آنے والی ابتدائی سفارش میں اس امر کی اہمیت پر زور دیا گیا کہ اقوام متحدہ کے تہذیبوں کے اتحاد کو ’’تہذیبوں کے اتحاد کا مصنوعی ذہانت کی اخلاقیات کا ضابطہ‘‘ مرتب کرنے کی ذمہ داری سونپی جائے۔
سفارش میں اس مقصد کے لیے تہذیبوں کے اتحاد کی قیادت میں ایک کمیٹی تشکیل دینے کی تجویز بھی شامل تھی، جس میں مختلف مذہبی قیادتوں کے نمائندوں کے علاوہ فکری، تعلیمی اور قانون سازی کے شعبوں کے ماہرین اور ٹیکنالوجی کمپنیوں کے نمائندے شامل ہوں، تاکہ اس حوالے سے عالمی سطح پر ایک مشترکہ اصول وضع کیا جا سکے۔
تنظیم کے اعلیٰ نمائندے میگوئل موراتینوس نے اس حوالے سے اپنی مکمل آمادگی کا اظہار کیا، جس پر شرکا نے ان کے اس مثبت تعاون کو سراہا اور ان کا شکریہ ادا کیا۔
سیکرٹری جنرل رابطہ عالم اسلامی نے یہ بھی اعلان کیا کہ رابطہ بعض ٹیکنالوجی کمپنیوں کے تعاون سے مصنوعی ذہانت کی ایک خصوصی لیبارٹری قائم کرے گی، جو مذہبی، تعلیمی اور انسانی اداروں، بالخصوص مذہبی امور سے وابستہ اداروں کے لیے مفید پروگرام تیار کرے گی۔
انہوں نے مزید اعلان کیا کہ متعدد اسلامی اور عربی مصادر وکتب کو ڈیجیٹل اور خودکار نظام میں منتقل کرنے پر کام کیا جائے گا، تاکہ انہیں مصنوعی ذہانت کی کمپنیوں کے لیے قابلِ رسائی بنایا جا سکے، جبکہ حقوقِ ملکیت کا مکمل لحاظ رکھا جائے گا۔
اسی طرح ترجمے کی غلطیوں کی نشاندہی اور ان کی اصلاح کے لیے ایک خصوصی یونٹ کے قیام کا بھی اعلان کیا گیا۔ اس کی وجہ یہ ہے کہ متعدد اسلامی نصوص اور ان سے متعلق علوم کے تراجم میں سنگین غلطیاں سامنے آئی ہیں، جن کے نتیجے میں ایسے مفاہیم پیدا ہوئے جو اصل حقیقت سے کوئی تعلق نہیں رکھتے، اور ان سے نہایت غلط تصورات اور گمراہ کن فہم نے جنم لیا۔
