رابطہ عالم اسلامی کی جانب سے شامی دارالحکومت دمشق میں دہشت گرد حملے کی شدید مذمت
مکہ مکرمہ:
رابطہ عالم اسلامی نے شامی دارالحکومت دمشق میں قصرِ عدل کے قریب ایک کیفے پر ہونے والے دہشت گرد حملے کی شدید مذمت کی ہے۔
رابطہ کے جنرل سیکرٹریٹ سے جاری بیان میں، سیکرٹری جنرل رابطہ اور چیئرمین مسلم علماء کونسل، عزت مآب شیخ ڈاکٹر محمد بن عبدالکریم العیسی نے تشدد اور دہشت گردی کو اس کی تمام شکلوں اور جوازوں سمیت مسترد کرنے کے اپنے اصولی موقف کا اعادہ کیا۔ آپ نے شام کے امن واستحکام اور وہاں کے شہریوں کی سلامتی کو خطرے میں ڈالنے والے ہر اقدام کے خلاف جمہوریہ عرب شام کے ساتھ یکجہتی کا اظہار کیا۔
آپ نے جاں بحق ہونے والوں کے لواحقین اور تمام شامی عوام سے دلی تعزیت کا اظہار کرتے ہوئے دعا کی کہ اللہ تعالی مرحومین کو اپنی جوارِ رحمت میں جگہ دے اور زخمیوں کو جلد اور کامل شفا عطا فرمائے۔
