رابطہ عالم اسلامی کی جانب سے سعودی عرب کے شہر الخرج پر مذموم ایرانی جارحیت کی شدید مذمت

رابطہ عالم اسلامی کی جانب سے سعودی عرب کے شہر الخرج پر مذموم ایرانی جارحیت کی شدید مذمت

مکہ مکرمہ:
رابطہ عالم اسلامی نے سعودی عرب کے شہر الخرج میں ایک رہائشی  عمارت کو نشانہ بنانے والی مذموم ایرانی جارحیت کی شدید الفاظ میں مذمت کی ہے۔ یہ کارروائی سعودی عرب اور دیگر کئی ممالک کے خلاف ایران کے مجرمانہ حملوں کے تسلسل کا حصہ ہے۔
رابطہ کے جنرل سیکرٹریٹ سے جاری ایک بیان میں، سیکرٹری جنرل  رابطہ  اور چیئرمین مسلم علماء کونسل، عزت مآب شیح  ڈاکٹر محمد بن عبدالکریم العیسیٰ نے ان مجرمانہ ایرانی حملوں کی دوبارہ مذمت کی، جو تمام مذہبی اقدار، عالمی قوانین اور انسانی روایات کی کھلی خلاف ورزی ہیں۔ انہوں نے اس بات پر زور دیا کہ یہ حملے خاص طور پر اس صورتحال میں انتہائی سنگین ہیں جب سعودی عرب نے جنگ کے حوالے سے ایک واضح اور اعلانیہ موقف اپنا رکھا ہے اور اس ضمن میں وہ مسلسل مخلصانہ اور دانشمندانہ کوششیں کر رہا ہے۔
ڈاکٹر العیسی  نے رابطہ کی عالمی اکیڈمیوں، اداروں اور کونسلوں سمیت اس کے پلیٹ فارم پر موجود تمام اسلامی اقوام کی جانب سے مملکتِ سعودی عرب کے ساتھ مکمل یکجہتی کا اعادہ کیا۔ انہوں نے واضح کیا کہ رابطہ ان تمام اقدامات کی بھرپور تائید کرتی ہے جو سعودی عرب اپنے امن و استحکام، خودمختاری اور اپنے شہریوں و مقیمین کی سلامتی کے تحفظ کے لیے اٹھاتا ہے۔ انہوں نے اللہ تعالیٰ کے حضور دعا کی کہ وہ اس سرزمین، اس کی قیادت اور عوام کو ہر قسم کے شر اور  آفت سے محفوظ رکھے۔
ڈاکٹر العیسیٰ نے جاں بحق ہونے والوں کے لواحقین سے خصوصی طور پر اور بالعموم مملکتِ سعودی عرب سے دلی تعزیت اور ہمدردی کا اظہار کیا، اور زخمیوں کی جلد شفایابی کے لیے دعا کی۔