رابطہ عالم اسلامی کی مسجد اقصیٰ میں اسرائیلی جارحیت اور مسلسل دراندازیوں کی شدید مذمت
مکہ مکرمہ:
رابطہ عالم اسلامی نے اسرائیلی آبادکاروں اور انتہاپسند وزراء کی جانب سے اسرائیلی قابض پولیس کی سرپرستی میں مسجد اقصیٰ اور اس کے صحنوں پر مسلسل دھاووں، بے حرمتی، نمازیوں پر حملوں، اشتعال انگیز اقدامات اور اسرائیلی پرچم لہرانے کی شدید الفاظ میں مذمت کی ہے۔
رابطہ کے جنرل سیکرٹریٹ سے جاری بیان میں، سیکرٹری جنرل رابطہ اور چیئرمین مسلم علماء کونسل، عزت مآب شیخ ڈاکٹر محمد بن عبد الکریم العیسی نے ان خطرناک خلاف ورزیوں کی سخت مذمت کرتے ہوئے کہا کہ یہ اقدامات دنیا بھر کے مسلمانوں کے جذبات کو مشتعل کرنے کا باعث ہیں، کیونکہ یہ اسلامی مقدسات کی حرمت پر سنگین حملہ ہیں۔ انہوں نے خبردار کیا کہ مشرقی القدس میں مقدسات کی تاریخی اور قانونی حیثیت کو تبدیل کرنے کے لیے اسرائیل کی مسلسل خلاف ورزیاں، اور اس حوالے سے بین الاقوامی قوانین کی پامالی، نہایت تشویش ناک ہے۔
ڈاکٹر العیسی نے اس امر پر زور دیا کہ بین الاقوامی برادری اپنی اخلاقی اور قانونی ذمہ داریاں ادا کرتے ہوئے ان خلاف ورزیوں کو فوری طور پر رکوانے کے لیے مؤثر کردار ادا کرے۔ انہوں نے اس حوالے سے مملکتِ سعودی عرب، عرب جمہوریہ مصر، مملکتِ اردن ہاشمی، اسلامی جمہوریہ پاکستان، جمہوریہ انڈونیشیا، جمہوریہ ترکیہ، ریاستِ قطر اور متحدہ عرب امارات کے وزرائے خارجہ کے مشترکہ بیان کے مندرجات کو بھرپور سراہتے ہوئے، مقبوضہ فلسطینی سرزمین میں اسرائیل کی تمام خلاف ورزیوں کے مقابلے اور فلسطینی عوام کے ساتھ ان کی ثابت قدم یکجہتی، نیز ان کے مقدسات کے تحفظ کے موقف کی بھرپور تائید کی۔
