رابطہ عالم اسلامی کی جانب سے مقبوضہ مغربی کنارے میں قابض حکومت کے اقدامات کے خلاف سعودی عرب، عرب، اسلامی اور دوست ممالک کے وزرائے خارجہ کے بیان کی تائید

مکہ مکرمہ
رابطہ عالم اسلامی نے مملکت سعودی عرب اور متعدد عرب، اسلامی اور دوست ممالک کے وزرائے خارجہ، نیز عرب لیگ اور اسلامی تعاون تنظیم کی جانب سے جاری کردہ اس بیان کا خیر مقدم کیا ہے جس میں مقبوضہ مغربی کنارے میں قابض اسرائیلی حکومت کے فیصلوں اور غیر قانونی اقدامات کی مذمت کی گئی ہے۔
رابطہ کے جنرل سیکرٹریٹ سے جاری بیان میں، سیکرٹری جنرل رابطہ اور چیئرمین مسلم علماء کونسل عزت مآب شیخ ڈاکٹر محمد بن عبد الکریم العیسی نے قابض حکومت کی جانب سے بین الاقوامی و انسانی قوانین اور روایات کی مسلسل خلاف ورزیوں کے سنگین نتائج سے ایک بار پھر خبردار کیا۔ انہوں نے اس تناظر میں فلسطینی سرزمین پر غیر قانونی بستیوں کی توسیع، جبری بے دخلی کی پالیسیوں اور الحاق  کی دھمکیوں کے سدِ باب کے لیے بین الاقوامی قانون کے مطابق ٹھوس اقدامات کرنے کے حوالے سے بیان میں ظاہر کیے گئے واضح اور پُرعزم عہد کی تعریف کی۔
ڈاکٹر العیسی نے عالمی برادری اور دنیا کے تمام انصاف و امن پسند ممالک سے مطالبہ کیا کہ وہ مقبوضہ فلسطینی سرزمین پر قابض حکومت کی خلاف ورزیوں کو روکنے کے لیے انفرادی اور اجتماعی طور پر اقدامات کریں، اور سلامتی کونسل کی قراردادوں اور اقوام متحدہ کی جنرل اسمبلی سے تائید شدہ دو ریاستی حل سے متعلق” نیویارک اعلامیہ “سمیت تمام بین الاقوامی فیصلوں کو نافذ کریں۔ انہوں نے فلسطینی عوام کے اپنے حقِ خودارادیت اور اپنی ریاست کے قیام کے غیر متزلزل تاریخی حق پر زور دیتے ہوئے کہا کہ یہی وہ واحد راستہ ہے جو خطے میں سلامتی اور استحکام کی ضمانت دینے والے منصفانہ اور جامع امن کی بنیاد بن سکتا ہے۔